பெண்களோ பெண்கள்!

பொங்கல் என்றாலே கிராமங்கள் தானா? சிங்காரச் சென்னையில் இருக்கும் வாலிபர்களுக்கு சந்தை, மாடு, ஜல்லிக்கட்டு போன்ற அடையாளங்கள் இல்லையென்றாலும் வேறுமாதிரியான பொங்கல் அடையாளங்கள் உண்டு. எங்களுக்கெல்லாம் பொங்கல் கொண்டாட்டம் டிசம்பர் இறுதியிலேயே தொடங்கிவிடுகிறது. தமிழர் பண்பாட்டை மறக்காமல் கிட்டத்தட்ட பதினைந்து நாட்களுக்கு பொங்கல் கொண்டாடும் வழக்கம் சென்னை வாலிபர்களுக்கு உண்டு என்று சொன்னால் ஆச்சரியமாக தானிருக்கும்.

பொங்கலுக்கு அடுப்பில் பொங்கல் வைத்து அது பொங்கிவரும்போது பொங்கலோ பொங்கல் என்று கோஷமிட்டு கொண்டாடுவது கிராமங்களில் வழக்கம் என்பதை சினிமாவிலோ, டிவியிலோ பார்த்து தெரிந்துகொள்ள முடிகிறது. நாங்களோ ஜனவரி மாதம் முழுவதும் “டாஸ்மாக்” எனும் பொதுமக்கள் வெகுவாக கூடும் ஸ்தலத்திற்குச் சென்று ஹேவார்ட்ஸ் 5000 மற்றும் கிங்பிஷர் குடுவைகளை குலுக்கி அது பொங்கிவரும்போது ஆனந்தக் கண்ணீருடன் நண்பர்களுடன் சியர்ஸ் சொல்லி பொங்கல் கொண்டாடுகிறோம்.

போகி அன்றும் எங்களது 'திருவிளையாடல்' தொடரும். பஞ்சர் சிவா கடையில் கெஞ்சிக் கூத்தாடி வாங்கிய பழைய சைக்கிள் டயர்களுடன் போகி கொண்டாடுவது எங்கள் பண்பாடு. அட்வெஞ்சரில் ஆர்வம் கொண்ட சில வாலிபர்கள் அந்த டயரின் ஒரு புறத்தை கொளுத்தி விட்டு அப்படியே ஒரு குச்சியால் எரிந்த டயரை ஓட்டிக் கொண்டு தெருவை வலம் வருவது வழக்கம். மார்கழிமாத கோலம் போடும் பிகர்களின் கவனத்தைக் கவர இதுமாதிரியான அட்வெஞ்சர்ஸ் அவசியம். சில ஆண்டுகளாக காவல்துறையினர் இந்த விளையாட்டுக்குத் தடை போட்டு எங்களது வாலிப வேகத்தை தடுத்து வருவது கடுமையாக கண்டிக்கத்தக்கது. காவல்துறையை கையில் வைத்திருக்கும் முதல்வர் இதற்கு பொறுப்பேற்க வேண்டும்.

போகி அன்று “மோளம்” அடித்துக் கொண்டே தெருவை வலம்வரும்போது நாம் வெட்டும் பிகரின் வீட்டின் எதிரில் நின்று “போகி போச்சி, பொங்கலும் போச்சி, பொண்ணு தாடா மாமோய்” என்று கோரஸாக கூச்சலிட்டு வருங்கால மாமனாரை கலாய்ப்பதும் உண்டு.

ஏதோ கிராமத்து இளைஞர்களுக்கு மட்டுமே வீரம் உண்டு. ஜல்லிக்கட்டில் தினவெடுத்த தோள்களுடன் பயமில்லாமல் முட்டும் மாடுகளை அடக்குகிறார்கள் என்ற மாயத்தோற்றம் அல்லது மாயவெளி அல்லது மாயபிம்பம் அல்லது என்ன எழவோ இருக்கிறது. அப்படியெல்லாம் எதுவும் இல்லை. நாங்களும் ரவுடிதான்.

பொங்கலுக்கு பதினைந்து நாள் முன்பே எங்களது “ஜல்லிக்கட்டு” ஜல்ஸாவாக ஆரம்பமாகிவிடுகிறது. டிசம்பர் 31 இரவு 12 மணிக்கே அசுரவேகத்தில், புல் மப்புடன் கொலைவெறியுடன் சொந்த பைக்கிலோ அல்லது ஓசி பைக்கிலோ பயணித்து எங்கேயாவது, எவனோடவாவது வீரத்துடன் முட்டிக் கொண்டு சாவது என்பதை எங்கள் பண்பாடாகவே வைத்திருக்கிறோம். உயிர் எங்களுக்கு தயிர்.

இவ்வாறாக பொங்கலையும், மாட்டுப் பொங்கலையும் கொண்டாடும் நாங்கள் காணும்பொங்கலை மட்டும் விட்டுவிடுவோமா? மார்கழி மாதம் முழுவதுமே எங்களுக்கு காணும் பொங்கல் தான். அதிகாலை 4 மணிக்கே எழுந்து, கிடுகிடுக்கும் குளிரில் பச்சைத் தண்ணீரில் குளித்து, பட்டை அடித்து, அப்பா பாக்கெட்டிலிருந்து அம்பதோ, நூறோ லவட்டி தெருவலம் செல்வது வழக்கம். அப்போது தான் 5.30 மணிக்கு மார்கழிமாத கோலம் போட வரும் நைட்டி நந்தினியையும், மிடி மீனாட்சியையும் அதிகாலையிலேயே சந்திக்க முடியும். பிகர்களை மேக்கப் இல்லாமல் ஒரிஜினல் பர்சனாலிட்டியில் மீட் செய்ய முடிவது இந்த காணும் பொங்கலில் மட்டுமே சாத்தியம்.

அதற்குப் பின்பாக குளிருக்கு இதமாக ஒரு கிங்ஸ் வாங்கி 4 பேர் ஷேர் செய்துக் கொண்டு பயபக்தியுடன் அருகிலிருக்கும் ஏதாவது கோயிலுக்குச் சென்றால் சில வயோதிகர்கள் ஏதோ மார்கழி பஜனை செய்து வெண்பொங்கலோ அல்லது சுண்டலோ தருவார்கள். மார்கழி மாதம் முழுவதுமே அப்பாவின் தண்டச்சோறு திட்டு இல்லாமல் கோயில்களில் எங்களுக்கு ராஜமரியாதையுடன் “டிபன்” தருகிறார்கள்.

காணும் பொங்கல் ஸ்பெஷலாக பிகர் வெட்ட அரசாங்கம் சிறப்பு அனுமதியாக சுற்றுலாப் பொருட்காட்சி நடத்துவதை சென்னையின் வாலிபச் சிங்கங்கள் நன்றியுடன் வருடாவருடம் நினைத்துப் பார்ப்போம். சுற்றுலாப் பொருட்காட்சி மட்டுமா? கடற்கரையில் காணும்பொங்கல் அன்று வங்காள விரிகுடாவில் அடிக்கும் அலை எங்களது ஜொள் அலையே. சித்தாள் பிகரிலிருந்து சாப்ட்வேர் பிகர் வரை ஒரே இடத்தில் காணவேண்டுமா? சென்னைக்கு ஜனவரி 17 அன்று வாருங்கள். கடற்கரையில் பிகர்களுக்கு பிலிம் காட்டுவதற்காக நீச்சல் தெரியாவிட்டாலும் கடலில் குதித்து வீரத்துடன் உயிர்த்தியாகம் செய்யும் வாலிபர்களை சென்னையில் மட்டுமே காணுவது சாத்தியம்.

பிகர் கிடைக்காமல் அவதிப்படும் வாலிபர்களுக்கு வரப்பிரசாதம் இந்த காணும் பொங்கலே. வண்டலூர் உயிரியல் பூங்காவுக்கோ அல்லது கிண்டி சிறுவர் பூங்காவுக்கோ சென்றால் அவரவர் பர்சனாலிட்டிக்கேற்ப தக்க எக்ஸ்போர்ட் பிகரையோ (எக்ஸ்போர்ட் கம்பெனியில் வேலை செய்யும் பிகர்), சித்தாள் ஃபிகரையோ கரெக்டு செய்ய முடியும். ஏற்கனவே பிகரை ரைட்டு செய்து வைத்திருக்கும் புண்ணியவான்களும் பிகர்களோடு கோவளம், மகாபலிபுரம் என்று ரவுண்டு கட்டி கொண்டாடும் வழக்கமும் உண்டு.

பொங்கலுக்கு அடுத்து விரைவில் வரும் காதலர் தினத்துக்கான ஆயத்தங்களைச் செய்ய பொங்கல் விடுமுறை சென்னை இளைஞர்களுக்கு கிடைத்திருக்கும் மிகப்பெரிய வரப்பிரசாதம் என்பதில் எந்த ஆச்சரியமும் இல்லை.

"பெண்களோ பெண்கள்"

ஆயிரத்தில் ஒருவன்!

'வெற்றி! வெற்றி' என்ற செண்டிமெண்டலான வசனத்தோடு தொடங்குகிறது படம். மணிமாறன் என்ற சாமானிய வைத்தியர், பெரிய புரட்சிக்காரனாக உருவாவதை 'திடுக்' திருப்பங்களோடு, இனிய பாடல்களோடு படமாக்கியிருக்கிறார்கள். இப்படத்தின் தாக்கம் ஐம்பதாண்டுகள் கழித்து எடுக்கப்பட்ட ஹாலிவுட் படங்களான கிளாடியேட்டர், பைரேட்ஸ் ஆஃப்ட த கரீபியன் ஆகியவற்றில் கூட இருப்பது ஆச்சரியமான ஒன்று.

சிவாஜிகணேசனை வைத்து, பல படங்களை எடுத்தவர், பி.ஆர்.பந்துலு. அவரது "வீரபாண்டிய கட்டபொம்மன்" மகத்தான வெற்றி பெற்றதுடன் பல பரிசுகளையும் பெற்றது. பின்னர் சிவாஜியை வைத்து அவர் தயாரித்த "கர்ணன்", "கப்பலோட்டிய தமிழன்" ஆகிய படங்கள் தரமானவையாக இருந்த போதிலும், போதிய வசூல் இல்லை. கடன் சுமையினால் பந்துலு தவித்தார்.

கடனில் இருந்து மீள, எம்.ஜி.ஆரை வைத்து ஒரு படம் தயாரிக்கத் தீர்மானித்தார். எம்.ஜி.ஆரை சந்தித்துப் பேசினார். அவர் படத்தில் நடிப்பதற்கு எம்.ஜி.ஆர். ஒப்புக்கொண்டு, கால்ஷீட் கொடுத்தார். "ஆயிரத்தில் ஒருவன்" என்ற பெயரில், படத்தை பிரமாண்டமாக கலரில் தயாரிக்க பந்துலு ஏற்பாடு செய்தார்.

கதாநாயகியாக ஜெயலலிதா ஒப்பந்தம் செய்யப்பட்டார். அவர் எம்.ஜி.ஆருடன் இணைந்து நடித்த முதல் படம் இதுதான். மற்றும் எம்.என்.நம்பியார், மனோகர், ராம்தாஸ், நாகேஷ், எல்.விஜயலட்சுமி, மாதவி ஆகியோரும் நடித்தனர்.

படத்தைப் பற்றி நாம் பேசுவதைவிட, படத்தில் கதாநாயகியாக நடித்த புரட்சித்தலைவியே பேசுவது மேலானது அல்லவா? தலைவரோடு, தலைவி நெருக்கமாக நடித்த காதல் காட்சியைப் பற்றி பேசுகிறார்.

ஓவர் டூ புரட்சித்தலைவி...

சினிமா உலகை பொறுத்தவரையில் நான் எம்.ஜி.ஆர். அவர்களுக்கு ரொம்பவே கடமைப்பட்டிருக்கிறேன். எங்கள் முதல் சந்திப்பே சுவாரஸ்யமானது. வெண்ணிற ஆடையில் நடிக்கும் முன் சில கன்னடப் படங்களில் நடித்துக் கொண்டிருந்தேன். அப்போது, ஆயிரத்தில் ஒருவன் படத்தை எடுக்க பந்துலு திட்டமிட்டிருந்தார். அதில் எம்.ஜி.ஆர் அவர்கள்தான் கதாநாயகன். பந்துலு அவர்கள் தயாரித்துக் கொண்டிருந்த படத்தில் கதாநாயகியாக நடித்துக் கொண்டிருந்த நானே ஆயிரத்தில் ஒருவனிலும் நடிக்க வேண்டும் என்பது பந்துலுவின் விருப்பம். என்னைப் பற்றி மெதுவாக எம்.ஜி.ஆர் அவர்களிடம் சொல்லி விட்டார் பந்துலு. நான் நடித்த கன்னடப் படத்தை, தான் (எம்.ஜி.ஆர்) பார்க்க விரும்புவதாக சொன்னாராம். அவர் பார்த்து சம்மதம் தெரிவித்த பிறகுதான் என்னை நடிக்க வைப்பதுப் பற்றி பேசி முடிவு செய்யப்படும் என்று பேசிக் கொண்டார்கள்.

அவர்களோடு உட்கார்ந்து நானும் கன்னட படம் பார்த்தேன். படம் பார்த்ததும் எம்.ஜி.ஆர் அவர்கள் எழுந்து பந்துலு பக்கம் திரும்பி சரி என்பதுபோல் தலையை ஆட்டிவிட்டு போனார். என் வாழ்நாளிலேயே அன்றுதான் பெரும் சந்தோஷம் அடைந்தேன்.

அவர் மற்றவர்களுக்கு கொடுக்கும் மரியாதை குறையவே குறையாது. யாரிடமும் சமமாக பழகுவார். தன்னைப் பற்றியும் தன் பாத்திரத்தைப் பற்றியும் சிந்தித்துக் கொண்டிருக்க மாட்டார்.படசெட்டில் தன்னோடு நடிக்கும் அத்தனை பேரையும் கவனித்து சொல்லிக் கொடுப்பார். கலகலவென்று பேசுவார் தலைவர். அதில் நகைச்சுவை கலந்திருக்கும். பதிலுக்கு நானும் லொட லொடவென்று பேசி வைப்பேன். இதற்காக எம்.ஜி.ஆர். எனக்கு சூட்டிய பெயர் வாயாடி.

முதல் காதல் காட்சியில் நடிக்கும்போது எனக்கு வெட்கமாக இருந்தது! என் முதல் படத்தில் காதல் காட்சிகளில் (வெண்ணிற ஆடை) நடிக்காமல் இருந்த எனக்கு அப்படியே எல்லாப் படங்களிலும் வரமுடியுமா? கூடாதல்லவா?

ஆயிரத்தில் ஒருவன் படத்தின் நாயகி ஓர் இளவரசி. அவளை வில்லன் வழக்கம்போல மணக்க விரும்புகிறான். தற்செயலாக அவளை கதாநாயகன் சந்திக்கிறான். வில்லனிடமிருந்து அவளை அவன் காப்பாற்றியாக வேண்டும்.

திருமணமான ஒரு பெண்ணை அந்த நாட்டின் ராஜாவான வில்லன் ஏறெடுத்து பார்க்க கூடாது. இப்படி ஒரு சட்டம் அந்த நாட்டில் உண்டு. சட்டத்தை மீற முடியுமா? மீறலாமா? தப்பு, தப்பு. எனவே, திருமணப் பத்திரிகை அச்சடிக்கபடாமலேயே இதில் வரும் கதாநாயகனுக்கும், கதாநாயகிக்கும் திருமணம் நடந்தேறி விடுகிறது. வெளி உலகின் கண்களுக்கு இப்போது கணவன்-மனைவி.ஆனால் கதாநாயகன்- இளவரசியின் கரத்தை பிடித்தவன் மனநிலை என்ன? வில்லனிடமிருந்து தப்பிச் செல்லவே இதை செய்தோம். இது திருமணமல்ல, தந்திரம். எனவே, இளவரசியின் கணவன் என்ற உரிமையை கொண்டாடக் கூடாது என்று கதாநாயகன் நினைக்கிறான். இளவரசியின் காதலை ஏற்க சாதாரண குடிமகனான காதலன் அஞ்சுகிறான். நியாயத்தின் அடிப்படையில். இந்நிலையில் ஒருநாள் இரவு இளவரசி உள்ளே படுத்திருக்க, கதாநாயகன் வெளியே வந்து படுக்கிறான். வானம் சும்மா இல்லை, இருளாகிறது. மேகத்தைக் கவ்வி இழுத்துக் கொண்டு கர்ஜிக்கிறது. மின்னலைத் தூதனுப்பி மழையையும் கொட்டு கொட்டென்று கொட்ட செய்கிறது.

அப்போது நாயகி நாயகனை உள்ளே அழைக்கிறாள். அந்தப் பாடல், நாணமோ...... நான் நடித்த முதல் காதல் காட்சி. நான் பல திரைப்படங்களில் காதல் காட்சிகளை கண்கொட்டாமல் பார்த்திருக்கிறேன். ஆங்கிலப் படம், இந்திப் படம், தமிழ் படம், தெலுங்கு படம், கன்னடப் படம் இப்படி எல்லா படங்களிலும் காதல் காட்சிகளைப் பார்த்திருக்கிறேன். ஆனால், நானே காதல் காட்சியில் முதன் முதலாக நடிக்க ஆரம்பித்த போதுதான், எனக்கு அதில் நடிப்பது எவ்வளவு கஷ்டமானது என்பது தெரிய வந்தது. என்னையும் மீறிய ஒரு நடுக்கம் ஏற்பட்டது. அதுவும் என்னுடன் நாயகனாக நடிப்பவர் எம்.ஜி.ஆர் என்பதை எண்ணியபோது எனது நடுக்கம் அதிகமானதே தவிர குறையவில்லை. ஒரு காட்சி படமாக்கப்படுவதற்கு முன்பாக ஒத்திகைப் பார்ப்பது வழக்கம். அதுவும் காதல் டூயட்டாக இருந்தால் நடன டைரக்டரும், அவரது உதவியாளரும், பாட்டுக்கேற்ப நடனமாடி, நாங்கள் எப்படி அக்காட்சியில் நடிக்க வேண்டுமென்பதை செய்து காட்டுவார்கள்.

ஆயிரத்தில் ஒருவன் படத்தின் நடன டைரக்டராகப் பணியாற்றியவர் தங்கப்பன். அவரது குழுவைச் சேர்ந்த ஓர் இளம் பெண்ணும், வாலிபரும் நாணமோ என்ற பாட்டுக்குரிய பாவனைகளை ஆடிக் காட்டினார்கள். ஆணும் பெண்ணுமாக அவர்கள் நெருக்கமாக நடித்துக் காட்டியபோது எனக்கு அது புதுமையாக இருந்தது. அவர்கள் செய்தபடி இப்போது நானும் எம்.ஜி.ஆரும் நடிக்க வேண்டும். ஏதோ இனம் தெரியாத உணர்வு என்னைப் பற்றிக் கொண்டது. காட்சி படமாக்கப்பட ஏற்பாடுகள் செய்யப்பட்டன. காமிரா முன்பு நான் நின்று கொண்டிருக்கிறேன். டைரக்டர் ஸ்டார்ட் என்று சொல்லி படப்பிடிப்பை ஆரம்பிக்க வேண்டியதுதான் பாக்கி. காதல் மயக்கத்தில் போதையோடு கதாநாயகனை நான் எனது விழிகளால் அளக்க வேண்டும். அதாவது அன்பு தோயப் பார்க்க வேண்டும். உடனே, கதாநாயகன் என்னை அப்படியே பதிலுக்குப் பார்த்தபடி நெருங்கி வந்து என்னை அணைத்துக் கொள்வார். இதுதான் படமாக்கப்படவிருந்த காட்சி. கேமிரா இயங்க ஆரம்பித்திருந்தது. கதாநாயகனான எம்.ஜி.ஆர் என்னை நெருங்கி வருகிறார். ஒன்றுமே ஓடவில்லை. திணறி போய்விட்டேன். எனது தவிப்பை தயாரிப்பாளரும் டைரக்டருமான பந்துலு சார் கண்டுக் கொண்டார் போலும்.என்னை கூப்பிட்டு, என்னம்மா குழந்தை நீ எம்.ஜி.ஆரை பார்க்க வேண்டாம். காமிராவைப் பார்த்தே நடிக்கலாம் என்று சொன்னதும் எனக்கு தைரியம் வந்துவிட்டது.

அந்த யோசனை எனக்கு கைக் கொடுத்தது. மீண்டும் எம்.ஜி.ஆருடன் அந்த காதல் கட்டத்தில் நடித்தபோது டைரக்டர் சொல்லிக் கொடுத்தபடி அன்றைய என் முதல் காதல் காட்சியில் நடித்து முடித்தேன். இந்தக் காட்சியின் தொடர்ச்சியாக அடுத்த காட்சியை படமாக்க செட்டில் ஆட்கள் பம்பரமாக சுழன்றனர். எம்.ஜி.ஆர் பாடிக் கொண்டே மலர் மஞ்சத்தில் நெருங்கி உட்கார்ந்து என்னருகில் நகர்ந்து நகர்ந்த வர, படுக்கையில் நான் மெல்ல சாய வேண்டும். இந்தக் காட்சியை படமாக்கும்போது எனக்கு குளிர் ஜுரமே வந்துவிட்டது போல் உடல் நடுங்க ஆரம்பித்துவிட்டது. அதை கண்டுபிடித்துவிட்ட எம்.ஜி.ஆர். ஏன் ஒரு மாதிரியா இருக்கீங்க? சோர்வாகவும் காணப்படறீங்க? என்று என்னை பார்த்து கேட்டார். ஒன்றுமில்லை, ஒன்றுமில்லை என்று ஏதோ சொல்லி சமாளித்தேன். வாய் பேசியதே தவிர என் உடல் நடுங்கிக் கொண்டுதான் இருந்தது. கட்டிலில் சாயும்போது உடல் நடுக்கத்தை சமாளிக்க வலது கையால் யாரும் கவனிக்காதபடி தலையணைக்குள் என் கையை விட்டு கட்டிலின் காலை கெட்டியாக பற்றிக் கொண்டேன். என் நடுக்கம் இதனால் நின்றது.

அன்றைய அந்த காதல் காட்சி சரியாக அமைய, முழு ஒத்துழைப்பும் கொடுத்து, எனக்கு எவ்வித பயமும் ஏற்படாத வகையில் தைரியமான வார்த்தைகளை சொல்லி என்னை சரிவர நடிக்க வைத்த எம்.ஜி.ஆருக்கு நான் மிகவும் கடமைப்பட்டிருக்கிறேன்.

திரைப்பட உலகில் ஆயிரக்கணக்கான நடிகைகள் நடித்த காதல் காட்சிகளில் ஒன்றுதான் அன்று நான் நடித்ததும், இருந்தாலும் நான் காதல் காட்சியில் அன்றுதானே முதன்முதலாக நடித்தேன். என் முதல் காதல் காட்சியில் நடித்து முடித்ததும் என் மனநிலை எப்படி இருந்தது தெரியுமா? எல்லோரும் என்னையே பார்த்துக் கொண்டிருக்கிறார்களோ என்ற பிரமைதான் என் நினைவைக் கவ்வி கொண்டிருந்தது. அந்த படப்பிடிப்பு முடிந்து வீடு திரும்பிக் கொண்டிருந்தேன். பெற்றோருக்கு தெரியாமல் ஒரு பெண் தன் காதலனை ரகசியமாக சந்தித்துவிட்டு வீடு திரும்பும்போது எங்கே பிறர் தன்னை கண்டுபிடித்துவிட்டு போட்டோகாசம் செய்வார்களோ என பயந்த நிலையுடன் வருவாளோ, அதுமாதிரிதான் நானும் இருந்தேன். இன்னும் சொல்லப் போனால், படப்பிடிப்பு குழுவினரும் ஸ்டுடியோ தொழிலாளர்களும்தான் இருந்தார்கள்.

அவர்கள் யாரும் என்னைப் பார்க்கவில்லை. என் நடிப்பை அவர்கள் அப்படி அதிசயமாக பார்த்திருக்க மாட்டார்கள். தினம் தினம் இப்படி பல காட்சிகளை கண்டவர்களாயிற்றே. எம்.ஜி.ஆருடன் நான் நடித்த முதல் காதல் காட்சியை காண தியேட்டரில் அமர்ந்திருந்தேன். வெள்ளித்திரையில் நான் நடித்த முதல் காட்சியைப் பார்த்தபோது ஏதோ அனுபவபட்ட நடிகை நடித்தது மாதிரிதான் எனக்கு பட்டது. நான் பயந்ததும். நடுங்கியதும் எனக்கே தெரியவில்லை.காதல் காட்சியில் நடித்த அன்று சில நடிகைகள் இரவு தூங்கவில்லை அந்தப் படப்பிடிப்பை பற்றியே நினைத்துக் கொண்டிருந்தேன் என்றெல்லாம் சொல்வார்கள். என்னைப் பொறுத்தவரையில் எந்த சலனமும் என் உறக்கத்தை பாதிக்கவில்லை. அன்றிரவு அருமையான தூக்கம் என்னைத் தழுவிக் கொண்டது.

(புரட்சித்தலைவி பேட்டிக்கு நன்றி : தமிழ்சினிமா.காம்)

ராஜவைத்தியம்!

'சுண்டி இழுக்கும் விளம்பர உலகம்' நூலை வாசித்த வாசகர் ஒருவர் ‘டிவி விளம்பரங்கள் தயாரிப்பது எப்படி?' என்று மின்னஞ்சல் அனுப்பியிருந்தார். அவரது தொலைபேசி எண்ணும் மடலில் இருந்ததால், தொலைபேசினேன். சினிமா போலவே இதற்கும் ஸ்க்ரிப்ட் எழுத வேண்டும் என்று சொன்னபோது ஆச்சரியப்பட்டார்.

ஒவ்வொரு ஏஜென்ஸியிலும் ஒவ்வொரு முறையில் ஸ்க்ரிப்ட் எழுதுவார்கள். இதற்காக காப்பிரைட்டர்கள் பணிக்கு அமர்த்தப் பட்டிருப்பார்கள். சினிமாவில் க்தை, திரைக்கதை, வசனம் எழுத ஒருவர் இருப்பார் இல்லையா? கிட்டத்தட்ட அதே பணியை காப்பிரைட்டர்கள் விளம்பரத்துக்கு செய்தாக வேண்டும். ஒவ்வொரு விளம்பரத்துக்கும் நான்கு, ஐந்து தீம்கள் எல்லாக் கோணத்திலும் அலசி பொதுவாக உருவாக்கப்படும்.

விளம்பரத்துக்கு எழுதுவதெல்லாம் பிரம்ம சூத்திரமல்ல. ஆனாலும் ஏனோ சிதம்பர ரகசியம் மாதிரி பொத்தி பொத்தியே மற்றவர்களுக்கு பெரிய பிரமிப்பினை ஏற்படுத்துகிறார்கள். நான் ஃப்ரீலான்சராக பணியாற்றியபோது ஒரு ஏஜென்ஸிக்கு கொடுத்த ஸ்க்ரிப்ட்டை கீழே தருகிறேன். இவ்வளவு சப்பை மேட்டரா என்று நீங்களே ஆச்சரியப்படுவீர்கள். இது மட்டுமே விளம்பரத்தினை உருவாக்கும் முறையல்ல. ஆனால் இதுவும் ஒருமுறை. ஓரளவுக்கு கிரியேட்டிவாக சிந்திக்கும் ஆற்றல் பெற்றவர்கள் யார் வேண்டுமானாலும் தரமான ஒரு விளம்பரத்தை உருவாக்கிவிட முடியும்.

ராஜ வைத்தியம்

Duration : 15 - 20 Seconds
Target Audience : 30 - 60 Age group (Particularly Megaserial audience)
Backdrop : அரசவை.

மந்திரிகள் புடைசூழ அரசர் அமர்ந்திருக்கிறார். நான்கு பேர் பிரத்யேகமாக அலங்கரிக்கப்பட்ட
சிம்மாசனங்களில் அமரவைக்கப்பட்டிருக்கிறார்கள். அவர்களது உடை சாதாரண குடிமக்களின் உடை. முகத்தில் சோகம்.

மன்னர் பேசுகிறார் : குடிமக்களே உங்களுக்கெல்லாம் என்ன பிரச்சினை?

நால்வரும் தனித்தனியாக : “மன்னரே எனக்கு முடக்குவாதம், நடக்கவே இயலவில்லை.”

“மன்னா எனக்கு தீர்க்கமுடியாத தோல்வியாதி”

“அரசே எனக்கு ரகசிய நோய்”

“ராஜா எனக்கு மஞ்சக்காமாலை”

அரசர் எழுந்து : “தீர்க்கமுடியாத பிரச்சினைகளை தீர்க்கத்தானே (நடந்தவாறே) உங்கள் ராஜா இருக்கிறேன்!” (கம்பீரமான குரலில்)

(நால்வருக்கும் அருகில் வரும் மன்னர் அவர்களை தொட்டு சிகிச்சை அளிக்கிறார்)

கருப்புத்திரையில் : நிஜமாகவே ராஜ வைத்தியம்! (வெள்ளையில் பெரிய எழுத்துக்கள்
வாய்ஸ் ஓவருடன்)

அடுத்த ப்ரேமிலும் வாய்ஸ் ஓவரோடு எழுத்துக்கள் தொடர்கிறது : வாதம், தோல் வியாதிகள், மஞ்சக்காமாலை, தீராத பாலியல் நோய்களுக்கு ராஜவைத்தியம்
நாங்கள் செய்கிறோம்.

மெல்லிய பின்னணி இசையோடு சிக்னேச்சர் : ராஜா சித்த மருத்துவமனை, முகவரி, தொலைபேசி எண், மின்னஞ்சல் மற்றும் இணையதளம்

பராமரிப்பு!

Duration : 20 - 30 Seconds
Target Audience : 25 - 65 Age group

Scene 1 : நடுரோட்டில் நடுத்தர வயதுடைய ஒருவர் ஸ்கூட்டரை உதைத்து ஸ்டார்ட் செய்ய முயற்சிக்கிறார். ஸ்கூட்டர் ஸ்டார்ட் ஆகவில்லை. நெற்றி வியர்வையை துடைத்து மீண்டும் மீண்டும் முயற்சித்துக் கொண்டிருக்கிறார்.

Backdrop voice : “என்னாச்சி?”

மனிதர் திரையை நோக்கி : “போனமாசம் மெக்கானிக் கிட்டே சர்வீசுக்கு விடலை. ஸ்டார்ட் ஆகாம மக்கர் பண்ணுது”

மீண்டும் உதைத்து ஸ்டார்ட் செய்ய முயற்சிக்கிறார்...


Scene 2 : தொட்டியில் வைக்கப்பட்ட ரோஜா செடி பட்டுப்போன நிலையில் இருக்கிறது. பின்னணியில் சோகமுகத்தோடு ஒரு இளம்பெண்.

Backdrop voice : “என்னாச்சி?”

பெண் திரையை நோக்கி : ஒரு வாரமா தண்ணி விடலை. செடி காஞ்சிடிச்சி..

மீண்டும் சோகமாக செடியை பார்க்கிறாள்.

Scene Fade out திரையில் எழுத்துக்கள் வாய்ஸ் ஓவரோடு : பராமரிப்பு இல்லாத எதிலுமே பழுது ஏற்படத்தான் செய்யும்

அடுத்த பிரேம் எழுத்துக்களோடு வாய்ஸ் ஓவர் : நாங்கள் உடல்களை பராமரிப்பதோடு பழுதும் பார்க்கிறோம், உயிர்களை காக்கிறோம்

அடுத்த பிரேம் எழுத்துக்களோடு வாய்ஸ் ஓவர் : வாதம், தோல் வியாதிகள், மஞ்சக்காமாலை மற்றும் தீராத பாலியல் நோய்களுக்கு நிச்சயத் தீர்வும் அளிக்கிறோம். பக்க விளைவுகளில்லாத சித்தமருத்துவ சிகிச்சை!

Scene 3 : வண்டியை ஸ்டார்ட் செய்து நடுத்தர வயது மனிதர் மகிழ்ச்சியோடு ஓட்டிச் செல்கிறார்.

Scene 4 : தொட்டியில் வைக்கப்பட்ட ரோஜா செடியில் இருமலர்கள் பூத்து குலுங்குகிறது. பின்னணியில் இளம்பெண்ணின் மலர்ச்சியான முகம்.

மெல்லிய பின்னணி இசையோடு சிக்னேச்சர் : ராஜா சித்த மருத்துவமனை, முகவரி, தொலைபேசி எண், மின்னஞ்சல் மற்றும் இணையதளம்

நோயற்ற வாழ்வே குறைவற்ற செல்வம்

Duration : 20 - 30 Seconds
Target Audience : All

Opening : கருப்பு வெள்ளை ஃபிலிம் ஸ்ட்ரிப்பில் அந்த காலத்து பாணியில் டைட்டில்- “நோயற்ற வாழ்வே குறைவற்ற செல்வம்” - Montage Effect உடன் இசையும் பழைய திரைப்படங்களை நினைவுறுத்த வேண்டும்.

Scene 1 (Black & White) : ஹீரோ சிவாஜி போல உடை மற்றும் சிகை அலங்காரத்தோடு. ஹீரோவின் அம்மா (பண்டரிபாய் ஜாடையில்) தண்ணீர் குடம் சுமந்து செல்லும்போது சுமக்க முடியாமல் கீழே விழுகிறார். ஹீரோ கண்ணீர் விட்டு கதறி ஓவர் ரியாக்ட்டு செய்கிறார்.

Background Voice : அம்மாவுக்கு வாதம்...

Scene 2 (Black & White) : தாவணி அணிந்த ஹீரோவின் தங்கை கழுத்தையும், முதுகையும் தொடர்ந்து சொறிந்து கொள்கிறாள். அதைப் பார்த்த ஹீரோ வாயைப் பொத்திக் கொண்டு கதறுகிறார்.

Background Voice : தங்கைக்கு தோல்நோய்

Scene 3 (Black & White) : ஹீரோவின் அப்பா கயிற்று கட்டிலில் சோர்வாக படுத்திருக்கிறார். கண்களில் கண்ணீரோடு ஹீரோவை பார்க்கிறார். ஹீரோ தலையில் அடித்துக்கொண்டு அழுகிறார்.

Background Voice : அப்பாவுக்கு மஞ்சள் காமாலை

Scene 4 (Black & White) : ஹீரோவின் தம்பி தூக்குக் கயிறை மாட்டிக் கொள்ளப் போகிறான். ஹீரோ ஓடிவந்து தடுக்கிறார். தரையில் புரண்டு புரண்டு அழுகிறார்.

Background Voice : ஏடாகூடமான தம்பிக்கு பால்வினை நோய்

(எல்லா காட்சிகளுக்குமே பின்னணியில் பயங்கர சோக இசை)

Background Voice (கருப்பு திரையில் வெள்ளை எழுத்து) : அய்யோ பாவம். குடும்பமே நோயில் மூழ்கிக் கிடக்க ஹீரோ என்னதான் செய்வார்?

Next Frame : எங்கள் மருத்துவமனைக்கு வருவார்.

Background Voice பக்கவிளைவில்லாத பாரம்பரிய சித்த மருத்துவ சிகிச்சை உற்சாகமாக எல்லா நோய்களுக்கும் நிச்சய தீர்வு!

மெல்லிய பின்னணி இசையோடு சிக்னேச்சர் : ராஜா சித்த மருத்துவமனை, முகவரி, தொலைபேசி எண், மின்னஞ்சல் மற்றும் இணையதளம்

அடுத்த ப்ரேமில் வண்ணத்தில் ஹீரோவின் குடும்ப போட்டோ. எல்லோரும் மகிழ்ச்சியாக நோய்தீர்ந்து காணப்படுகிறார்கள்.

சஞ்சீவினி

Duration : 20 - 30 Seconds
Target Audience : All

Opening : ஆஞ்சநேயர் சஞ்சீவி மலையை தூக்கிக்கொண்டு வந்து ஒரு மருத்துவரிடம் தருகிறார். மருத்துவர் அந்த மலையில் முளைத்திருக்கும் மூலிகைச் செடியிலிருந்து சில இலைகளை பறித்து, அரைக்கிறார்.

Background Voice : மூலிகை என்பது வெறும் செடியல்ல. நம் உயிர்காக்கும் மாமருந்து.

Blank Screen எழுத்துக்களோடு வாய்ஸ் ஓவர் : பாரதத்தின் பாரம்பரியத்தை நாங்கள் மறக்கவில்லை. பக்கவிளைவில்லாத பாரம்பரிய சிகிச்சை முறைகளையே அளிக்கிறோம்.

அடுத்த பிரேம் எழுத்துக்களோடு வாய்ஸ் ஓவர் : வாதம், தோல் வியாதிகள், மஞ்சக்காமாலை மற்றும் தீராத பாலியல் நோய்களுக்கு நிச்சயத் தீர்வும் அளிக்கிறோம்.

மெல்லிய பின்னணி இசையோடு சிக்னேச்சர் : ராஜா சித்த மருத்துவமனை, முகவரி, தொலைபேசி எண், மின்னஞ்சல் மற்றும் இணையதளம்


இதுதான் விளம்பரம் உருவாக்குவதற்கான ஸ்க்ரிப்ட். இதில் ஒன்றோ, இரண்டோ க்ளையண்டால் அப்ரூவ் செய்யப்படும் பட்சத்தில் ‘ஸ்டோரி போர்டு' என்ற அடுத்தக் கட்டத்துக்கு நகரும். இதெல்லாம் தேவைப்படாமலேயே உப்புமா விளம்பரங்களையும் உருவாக்க முடியும். எல்லாமே துட்டின் அடிப்படையில்.

நீங்களும் ஏதாவது கற்பனை பிராடக்டுக்கு இதுபோல ஸ்க்ரிப்ட் எழுதிப் பழகலாம். மேலும் டெக்னிக்குகளை தெரிந்துகொள்ள, ஹி.. ஹி.. மேலே உள்ள புத்தகத்தை வாங்கவும்!

பதிவர்களுக்காக மாதப்பத்திரிகை!

சர்புதீன் என்ற தோழர் தமிழிணையத்தில் பதியப்படும் கதை, கட்டுரை, கவிதை இத்யாதிகளை வைத்தே ஒரு தனி மாத இதழ் நடத்த முன்வந்திருக்கிறார். கடந்த இரண்டு வருடங்களாக செயல்பட்டு வரும் ‘வெள்ளிநிலா' என்ற மாத இதழை இதற்காக பயன்படுத்த இருப்பதாக அறிவித்திருக்கிறார்.

இது தொடர்பான தோழர் சர்புதீனின் இடுகையை காணவும்!

ஜேம்ஸ் கேமரூன் : அரசன் அல்ல கடவுள்!

பண்ணிரெண்டு ஆண்டுகளுக்கு முன்பாக வெளியான டைட்டானிக் திரைப்படம் ஏற்படுத்திய தாக்கத்தை யாரும் அவ்வளவு எளிதில் மறந்துவிட முடியாது. அதன் இயக்குனர் ஜேம்ஸ் கேமரூன் ஒருமுறை சொன்னார். “நான் இந்த உலகுக்கு அரசன்”. ,‘அவதார்’ திரைப்படத்தின் முதல் காட்சியை இங்கே கண்டுகளித்த இந்தியாவின் தலைசிறந்த இயக்குனர்களில் ஒருவரான ராம்கோபால் வர்மா சொல்கிறார். “கேமரூன் அரசன் அல்ல. கடவுள்!”.

வர்மா சொல்வதை வெறும் புகழ்மாலையாக மட்டுமே எடுத்துக் கொள்ள வேண்டியதில்லை. ஏனெனில் டிசம்பர் 18 அன்று, ‘அவதார்’ வெளியான முதல் நாளிலேயே இந்தியாவில் மட்டும் 6.75 கோடி ரூபாய், உலகளவில் 127 கோடி ரூபாய் என்று வசூலை அள்ளிக் கொட்டியிருக்கிறது. அமெரிக்காவில் மட்டுமே ஒரு மாதத்தில் ரூ.2860 கோடி ரூபாயை வசூல் எட்டிவிடும் என்கிறார்கள். படத்தின் செலவு ரூ.1200 கோடி மட்டுமே என்று அறிவிக்கப்பட்டிருக்கிறது. ஒரு சினிமா ஆயிரம், ஆயிரம் கோடிகளாக அள்ளிக் கொட்டுவது சாத்தியமா என்றால், இன்றைய நிலையில் ஜேம்ஸ் கேமரூனுக்கு எளிமையான சாத்தியமே.

உலகமே அவதாரை தூக்கி தலையில் வைத்துக் கொண்டாட, ஜேம்ஸ் கேமரூன் மட்டும் கொஞ்சூண்டு வருத்தத்தில் இருக்கிறார். அவரது முந்தையப் படமான டைட்டானிக் முதல் நாளிலேயே 134 கோடி வசூலித்ததாம். இந்தப் படத்துக்கு 7 கோடி ரூபாய் குறைந்துவிட்டதாம். அடிச்சி ஆடுங்க கேமரூன். உங்க கடலிலே இப்போ சுனாமி!

டைட்டானிக்குக்கும், அவதாருக்கும் ஏன் பண்ணிரெண்டு ஆண்டு இடைவெளி? உண்மையில் பார்க்கப் போனால் பதினைந்து ஆண்டுகளுக்கு முன்பாகவே அவதார் படத்தின் 114 பக்க ஸ்க்ரிப்டை கேமரூன் தயார் செய்துவிட்டார். ஆனாலும் அன்று இருந்த தொழில்நுட்பத்தில் இப்படம் சாத்தியமாகாது என்று நினைத்தார்.
முழுமையாக ஒரு படைப்பை தருவதற்கு தேவையான தொழில்நுட்பம் வரும் வரை ஒரு கலைஞன் காத்திருப்பது எத்தகைய அர்ப்பணிப்பு? டைட்டானிக் வெளியானதற்குப் பிறகு படம் இயக்க கேமரூனை அழைத்து கோடி, கோடியாக சம்பளம் தர எவ்வளவோ தயாரிப்பாளர்கள் வரிசையில் நிற்க, அவரோ அடம்பிடித்து அவதாருக்காக காத்திருந்தார்.

அப்படி என்ன ஸ்பெஷல் அவதாரில்?

இதுவரை அயல்கிரக வாசிகளை பற்றிய படம் என்றால் ஹாலிவுட்டில் ஒரு வெற்றி பார்முலா வைத்திருந்தார்கள். அயல்கிரக வாசிகள் பூமிக்கு படையெடுப்பார்கள். மனித குலத்தை அழித்து பூமியை தமதாக்கிக் கொள்ள போர் தொடுப்பார்கள். அமெரிக்காவின் அதிபர் நேரடியாக களமிறங்கி அவர்களை துரத்தியடித்து மனிதகுலத்தை காப்பார். ஏற்கனவே அயல்கிரக வாசிகளை வில்லன்களாக்கி, மனிதநேயத்தை கச்சாப்பொருளாக்கி வந்த நூற்றுக்கணக்கில் படங்கள் நல்ல காசு பார்த்துள்ளன.

இங்கேதான் மாறுபடுகிறது அவதார். இப்படத்தில் மனிதர்கள் வில்லன்கள். நவிக்கள் எனப்படும் அயல்கிரகவாசிகள் தங்கள் கிரகத்தை பாதுகாக்க மனிதர்களோடு போராடுகிறார்கள். நல்ல மனம் படைத்த சில மனிதர்களின் துணையோடு வெற்றியும் காண்கிறார்கள். ஹாலிவுட்டின் அயல்கிரக மோகத்தின் அடிப்படையையே மாற்றி யோசித்ததுதான் அவதாரின் வெற்றி.

படத்தின் கதை என்ன?

பூமியிலிருந்து 4.4 ஒளியாண்டுகள் தூரத்தில் (ஒரு ஒளியாண்டு என்பது ஒளியின் வேகத்தில் ஒரு ஆண்டு முழுக்க பயணிக்கும் தூரம்) இருக்கும் ஆல்பா செண்ட்ரி நட்சத்திரக் கூட்டத்தில் இருக்கும் ஒரு கிரகம் பண்டோரா. யூனோப்டைனாயம் என்று சொல்லக்கூடிய தோரியத்தை விட பன்மடங்கு விலையுயர்ந்த கனிமம் அங்கே ஏராளமாக கிடைக்கிறது. ஒரு சிறிய துண்டு யூனோப்டைனாயம் பல கோடி ரூபாய் மதிப்பு வாய்ந்தது என்று படத்தில் சித்தரிக்கப்படுகிறது.

பண்டோராவில் ஜீவராசிகள் உண்டு. ‘நவி’க்கள் என்று மனிதர்களை ஒத்த இனமும் உண்டு. கிட்டத்தட்ட மனிதத் தோற்றத்தில் இருக்கும் நவிக்கள் சாதாரணமாக பத்து அடி உயரம் கொண்டவர்கள். அவர்களது நிறம் நீலம். நவிக்களுக்கு தனி கலாச்சாரம் உண்டு. நம் உலகின் பழங்குடியின மக்களின் கலாச்சாரத்தை ஒத்தவர்கள். இயற்கையோடு இசைந்து வாழ்பவர்கள். சில மாந்த்ரீக சக்திகளை தங்களது தெய்வமான அய்வாவிடமிருந்து பெறுகிறார்கள். பண்டோராவில் மனிதர்கள் ஆதிக்கம் செலுத்த இந்த நவிக்களே தடையாக இருக்கிறார்கள்.

எனவே புதியதாக நவிக்களை உருவாக்கி, இங்கிருக்கும் மனிதர்களின் சிந்தனையை, உருவாக்கப்பட்ட நவிக்கள் மீது ஏற்படுத்தி அவர்களது கூட்டத்தோடு கலக்கச்செய்து, பண்டோராவை ஆராய்வதே ‘அவதார்’ திட்டம். இந்த விஷயத்தை புரிந்துகொள்வது சற்று கடினமானது. மிக எளிமையாக சொல்ல வேண்டுமானால் நம் விட்டலாச்சார்யா படங்களில் பார்த்த கூடு விட்டு கூடு பாயும் வித்தையை ஒப்பிடலாம். அதாவது ஒரு நவியின் உடலில் ஒரு மனிதன் கூடுபாய்வது என்று எடுத்துக் கொள்ளலாம்.

இவ்வாறு கூடுபாயும் ஊனமுற்ற ஹீரோ, அங்கிருக்கும் நவி கூட்டத் தலைவரின் மகளோடு காதல்வசப்படுகிறான். நடக்க இயலாத அவன் நவி உடலில் பாய்ந்தப் பிறகு தாவுகிறான், ஓடுகிறான். ஒரு கட்டத்தில் தன் மனிதவாழ்க்கையை விட, நவி வாழ்க்கையை விரும்ப ஆரம்பித்து விடுகிறான். தன்னை ஒரு நவியாகவே உணர்கிறான்.

படத்தின் இரண்டாம் பாதியில் நவீன ஆயுதங்களோடு மனிதர்கள், நவிக்கள் மீது போர்தொடுத்து அவர்களது வசிப்பிடங்களை அழிக்க முற்படும்போது, ஹீரோ நவிக்களுக்கு தலைமைதாங்கி மனிதர்களை வெல்கிறான். இதுதான் கதை. இப்படத்தின் கதை அடக்குமுறைக்கு எதிரானது என்று உலக அரசியல் நோக்கர்களால் பெரிதும் பாராட்டப்படுகிறது. குறிப்பாக உலகில் தற்போது நடந்துவரும் சில வளர்ந்த நாடுகளின் சுயநலங்களை அப்பட்டமாக தோலுரித்துக் காட்டுகிறது. மனிதர்களின் தவறுகளை நேரடியாக சுட்டிக்காட்டாமல், விலங்குகளை பாத்திரங்களாக அமைத்து கதை சொல்லிய ஈசாப் குட்டிக்கதைகள் பாணி இது.
இந்தக் கதையை படமாக்க அப்படி என்ன பெரிய தொழில்நுட்பம் கேமரூனுக்கு தேவைப்பட்டது.

பத்து அடி உயர நவிக்களை ஆயிரக்கணக்கில் தத்ரூபமாக உருவாக்குவது. யாருமே கற்பனை கூட செய்யமுடியாத ஒரு புதிய கிரகத்தையும், அவர் மனதுக்குள் கற்பனை செய்து வைத்திருக்கும், அக்கிரகத்தின் தாவரங்கள் மற்றும் வினோத ஜீவராசிகளோடு கூடிய வித்தியாச சூழலையும் ஏற்படுத்துவது. 2002ஆம் ஆண்டு லார்ட் ஆஃப் தி ரிங்ஸ் படத்தின் இரண்டாம் பாகத்தை கண்டவுடன் அவதாரை உருவாக்கிவிடலாம் என்று கேமரூனுக்கு நம்பிக்கை ஏற்பட்டது.

படத்துக்கு கம்ப்யூட்டர் விஷூவல் பணிகள் நடந்துகொண்டிருந்தபோது கேமரூன் சொன்னார். “இப்போது நான் செய்து கொண்டிருப்பதுதான் ஒரு முழுமையான படைப்பை உருவாக்குவதற்கான ஒரே வழி. யாருமே கண்டறியாத ஒரு மரத்தையோ, மலையையோ, வானத்தையோ புதியதாக உருவாக்கும்போது, அந்த படைப்பாளிக்கு தான் உருவாக்கும் விஷயங்களின் மீது முழுமையான ஆதிக்கம் தேவை. பண்டோரா கிரகம் முழுக்க முழுக்க இப்போது என்னுடைய ஆதிக்கத்தில் இருக்கிறது”.

தொடர்ச்சியாக உணர்வுபூர்வமான செண்டிமெண்ட் விஷயங்களையே படமாக எடுப்பது கேமரூனின் பாணி. உணர்ச்சிகளை வியாபாரமாக்குகிறார் என்று சில தீவிர சினிமா விமர்சகர்கள் கேமரூனை குற்றம் சாட்டுகிறார்கள். கேமரூன் இந்த விமர்சனத்தை ஒப்புக் கொள்கிறார். “செண்டிமெண்டான காட்சிகள் ரசிகர்களின் உள்ளத்தை தொடுகிறது. தங்கள் உள்ளத்தை தொட்ட விஷயங்களை அவர்கள் மற்றவர்களோடு பகிர்ந்துகொள்கிறார்கள். இதனால் தான் என் படங்கள் உலகம் முழுக்க கொண்டாடப்படுகிறது. என் படங்கள் நன்றாக வியாபாரம் ஆகிறது என்று சொல்லப்பட்டால் அது நல்ல விஷயம்தானே? இதை ஏன் நான் விமர்சனமாக எடுத்துக் கொள்ள வேண்டும்?” என்று கேட்கிறார்.

அவதார் வெளியாவதற்கு முன்பே விருதுகளை அள்ளிக்கொட்ட ஆரம்பித்து விட்டது. கேமரூனின் டைட்டானிக் பதினோரு ஆஸ்கர் விருதுகளை வென்றது. அவதாரும் அதுபோலவே அரை டஜன் விருதுகளை பல துறைகளில் அள்ளிக் குவிக்கும் என்று ஹாலிவுட்டில் பரபரப்பு பேச்சு. அமெரிக்காவின் ஹாலிவுட்டையே கலகலக்கச் செய்துகொண்டிருக்கும் கேமரூன் அமெரிக்கர் அல்ல. கனடியர்.

கேமரூன் எடுக்கும் படங்கள் ஒவ்வொன்றுமே ‘ட்ரெண்ட் செட்டர்’ என்று சொல்லப்படக்கூடிய வகையிலானது. இவர் டெர்மினேட்டர்-ஜட்ஜ்மெண்ட் டே எடுத்தபோது, அப்படத்தைப் போலவே காட்சிகள் அமைத்து, புற்றீசல்போல பல படங்கள் அந்த காலத்தில் வெளிவந்தது. டைட்டானிக் வெளிவந்தபோது காதல், கப்பல் என்று ஹாலிவுட்டில் மட்டுமல்லாமல் உலகம் முழுக்க ஏகப்பட்ட திரைமுயற்சிகள்.

இப்போது அவதார். இதுதான் படம். அடுத்த பத்தாண்டுகளுக்கு இது மட்டும்தான் முன்னோடிப்படம். இனி உருவாக்கப்படும் படங்கள் மனிதநேயத்தை கைவிட்டு, ‘அயல்கிரகவாசி நேயத்தை’ கையில் எடுத்துக்கொள்ளும். ஒரு கலைஞனின் தனித்துவமே வழக்கமான மரபை கட்டுடைத்து, புதிய பாணியை உருவாக்குவதுதான். கேமரூன் தனது முப்பதாண்டு திரைவாழ்வில் பலமுறை பல புதிய பாணிகளை உருவாக்கித் தந்திருக்கிறார்.

(நன்றி : கறைஆண்கள் - இலக்கிய ஆயுளிதழ்)